Саас кэрэ эрээри, сэрэхтээх!
Чурапчы нэһилиэгин «Кыталык», «Мичил», «Туллукчаан, «Улыбка» уһуйааннарыгар сылдьан, улахан уонна бэлэмнэнии бөлөх оҕолорун кытта «Саас кэрэ эрээри, сэрэхтээх» диэн, ханнык тугэннэргэ сэрэхтээх буолуохха сөбүн туһунан кэпсэттибит. Оҕолор былдьаһа-тараһа бэйэлэрин санааларын, өйдөбүллэрин сөптөөхтүк кэпсээтилэр. «Сэрэниҥ, чараас муус» диэн хартыынаҕа оҕо туохха сыыспытын ырытыстыбыт, памяткалары (өйдөтер, сэрэтэр листовкалары) хас группа ахсын түҥэттибит. Көрсүһүү түмүгэр «Таал-Таал эмээхсин» остуоруйаны сыахай куукуланан көрдөрдүбүт.
Нэдиэлэ икки күнүгэр «Ааҕыы» куруһуогун оголоругар Элинор Портер суруйбут «Поллианна» диэн айымньытынан, хас саҥа күнү үөрүүнэн көрсөр, хайа да түгэннэ санаатын түһэрбэт, ханнык баҕар киһиэхэ үтүө сыһыаны олохтуур, уһулуччу айылгылаах тулаайах кыыс туһунан киинэни көрдөрдүбүт. Сорох оҕо сэҥээрдэ, сорох суох. 4 «г» кылаас үөрэнээччитэ Сайаана Николаева чуумпуран олорон, дьиэ кэргэнинэн көрөргө үчүгэй диэн сыаналаата.
«Олоҥхо алыптаах эйгэтэ» кинигэ быыстапкатын улуустааҕы «Ноо! — дэтэн чуопчаарыах» диэн оҕолорго аналлаах олоҥхону толоруу бэстибээлигэр туруордубут. Олонхону оҕоҕо уһуйааччылар Юрий Борисов «Баһырҕастаах аттаах Баабый Баатыр» оҕо-аймах, ыччат олоҥхото кинигэтин, Петр Пестряков «Элэс Боотур»диэн П. Оготоев суруйбут олоҥхотугар уруһуйдарын сэҥээрэ көрдүлэр. Оскуола оҕолорун сахалыы эйгэҕэ чугаһатар сыалтан, бу тэрээһиҥҥэ ыҥыран сырытыннардыбыт.
