Саас кэрэ эрээри, сэрэхтээх!
Оҕо төрөөбүт тылынан ааҕарын көҕүлүүр «Төрөөбүт тыл биһигэ» киин Чурапчы нэһилиэгин «Кыталык», «Мичил», «Туллукчаан, «Улыбка» уһуйааннарыгар сылдьан, улахан уонна бэлэмнэнии бөлөх оҕолорун кытта «Саас кэрэ эрээри, сэрэхтээх» диэн бэсиэдэлэри ыыттыбыт уонна ханнык тугэннэргэ сэрэхтээх буолуохха сөбүн туһунан кэпсэттибит. Оҕолор былдьаһа-тараһа бэйэлэрин санааларын, өйдөбүллэрин сөптөөхтүк кэпсээтилэр. «Сэрэниҥ, чараас муус» диэн хартыынаҕа оҕо туохха сыыспытын ырытыстыбыт, памяткалары (өйдөтөр, сэрэтэр листовкалары) хас группа ахсын түҥэттибит. Көрсүһүү түмүгэр «Таал-Таал эмээхсин» остуоруйаны сыахай куукуланан көрдөрдүбүт.
«Олоҥхо алыптаах эйгэтэ» кинигэ быыстапкатын улуустааҕы «Ноо! — дэтэн чуопчаарыах» диэн оҕолорго аналлаах олоҥхону толоруу бэстибээлигэр туруордубут. Олонхону оҕоҕо уһуйааччылар Юрий Борисов «Баһырҕастаах аттаах Баабый Баатыр» оҕо-аймах, ыччат олоҥхото кинигэтин, Петр Пестряков «Элэс Боотур»диэн П. Оготоев суруйбут олоҥхотугар уруһуйдарын сэҥээрэ көрдүлэр. Бэстибээл арыллыыта А. П. Гоголев аатынан Чурапчытааҕы оҕо ускуустуба оскуолатын «Театральнай кылаас», «Сыахайдар» бөлөх оҕолоро биллиилээх суруйааччы, поэт М. Доҕордуурап «Аҕыс былас суһуохтаах Айталыын Куо» олоҥхотун, куукула тыйаатырын дьүһүйүүтүнэн арыйдылар. Оскуола оҕолорун сахалыы эйгэҕэ чугаһатар сыалтан, бу 6-7 кылаас оҕолорун тэрээһиҥҥэ ыҥыран сырытыннардыбыт.
Тэрээһинтэн быһа тардыыны бу сигэнэн киирэн көрүҥ:
https://vkvideo.ru/video-236094686_456239065
