Остуоруйа кэһиилээх эбэ
Ыам ыйын 12 күнүгэр буолбут «Эбэ ааҕар» тэрээһиҥҥэ, Саха Республикатын култууратын туйгуна Варвара Ивановна Душкина остуоруйа кэһиилээх ыалдьыттаата. Кини истээччилэринэн, С.А.Новгородов аатынан Чурапчы орто оскуолатын 3 «г» кылааһын үөрэнээччилэрэ буоллулар (кыл.сал. Е. К. Карпова).
Былыр — былыргыттан өбүгэлэрбит, остуоруйа кэпсээн, оҕолорун үчүгэйи — куһаҕаны араарарга, толкуйдуурга үөрэтэллэрэ, олоххо бэлэмнииллэрэ. Эйэҕэс эбэ оҕолорго «Тэбэр Тиэхэ бэтиэхэлэрэ» остуоруйаны бэрт сэргэхтик, ис хоһоонун өйдөтөн аахта.
Бу остуоруйа киһи майгытын күлүк өттүн көрдөрөр. Ол курдук, биһирэмнээх дьоруой суох. Оҕо олоххо көстөр араас быһыыны — майгыны, дьон үчүгэй да, куһаҕан да өрүтүн арааран өйдүү үөрэнэригэр туһалаах.
Остуоруйаны оҕолор чуумпуран олорон иһиттилэр, бүтэһигэр ырытыстылар уонна астыммыттарын биллэрдилэр. Кылаас аатыттан Буойа Ноговицына эйэҕэс эбэҕэ махтанан туран бэлэх туттарбыта, долгутуулаах түгэн буолла.
Бу сигэнэн киир:
https://vkvideo.ru/video-236094686_456239081
