Өрөспүүбүлүкэ күнүн көрсө
Муус устар 27 күнэ Саха сирин устуоруйатыгар ураты суолталаах.
1920 с. П.А. Ойуунускай салайааччылаах анал хамыыһыйа национальнай суверенитекка олоҕурбут Саха Өрөспүүбүлүкэтин кэлэр дьылҕатын быһаарар бырайыагы бэлэмнээбитэ. Биир сүрүн көҕүлээччи М.К. Аммосов этэ. Чопчу кини ССКП уонна РСФСР Омуктар дьыалаларыгар норуодунай комиссариатын иннилэригэр Саха Автономнай Сэбиэскэй Социалистическай Өрөспүүбүлүкэтин тэрийэр туһунан боппуруоһу көтөхпүтэ. Кини дакылаатыгар олоҕуран, уобаластааҕы баартыйа мунньаҕа автономияны киллэрэр туһунан резолюция ылыммыта. Маны 1921 с. алтынньытыгар буолбут Саха сиринээҕи өрөбөлүүссүйэ кэмитиэттэрин бастакы сийиэһигэр эмиэ өйөөбүттэрэ. 1922 с. муус устар 27 күнүгэр ВЦИК Президиума Саха Автономиятын туһунан уураах таһаарбыта. Ити сыл бэс ыйыгар Ойуунускай салайааччылаах бастакы бырабыыталыстыба тэриллибитэ.
1990 с. балаҕан ыйын 27 күнүгэр Саха Өрөспүүбүлүкэтин Судаарыстыбаннай Суверенитетын туһунан декларация ылыллыбыта. 1991 с. ахсынньы ыйыгар бастакы бэрэсидьиэнинэн М.Е. Николаев талыллыбыта. 1992 с. муус устар 27 күнүгэр Саха Өрөспүүбүлүкэтин Төрүт Сокуона (Конституцията) күүһүгэр киирбитэ.
Билигин муус устар 27 күнүн Өрөспүүбүлүкэ күнүн быһыытынан билинэбит! Бу күнү көрсө, оҕо библиотеката оскуола оҕолоругар бэсиэдэлэри уонна интерактивнай оонньуулары ыытта, ону таһынан С. А. Новгородов аатынан Чурапчы орто оскуолатыгар кинигэ быыстапкатын туруорда.
