Оҕо кинигэтин нэдиэлэтэ («Неделя детской книги» — 28.03 — 5.04)
Кулун тутар 28 күнүттэн – муус устар 5 күнүгэр диэри Арассыыйаҕа Оҕо кинигэтин нэдиэлэтэ ыытыллар. Бу 1943 сылтан саҕаламмыт сааскы өрөбүллэргэ сөп түбэһиннэрэн ыытыллар, сырдатар аахсыйа буолар. Аахсыйа сүрүн сыала – ааҕыыны киэҥник тарҕатыы. Биһиги оҕо кинигэтин нэдиэлэтин («Неделя детской книги» — 28.03 — 5.04) кулун тутар 26 күнүттэн саҕалаатыбыт. Бу күн Чурапчы нэһилиэгин уһуйааннарын улахан уонна бэлэмнэнии бөлөх иитиллэччилэрин икки ардыларыгар «Күөх халлаан анныгар…» уус-уран ааҕыы күрэҕэ ыытылынна. Тэрээһиҥҥэ 5 уһуйаантан 46 оҕо кыттыыны ылла. Күрэх сүрүн сыала-соруга оҕоҕо уһуйаан сааһыттан саҕалаан төрөөбүт тылга, ааҕыыга тапталы иҥэрии буолар. Күрэххэ үбүлүөйдээх оҕо суруйааччылара Петр Поликарпович Одорусов төрөөбүтэ 95, Анатолий Гаврилович Старостин — Сиэн кынат 80, Иннокентий Илларионович Эртюков төрөөбүтэ 110, Павел Николаевич Харитонов — Ойуку 85 сылларыгар анаан, кинилэр суруйбут хоһооннорун биирдиилээн уонна бөлөҕүнэн аахтылар.
Уонна аахсыйа чэрчитинэн «Эбэ ааҕар» тэрээһиммитин ыыттыбыт. “Эбэ ааҕар” тэрээһин «Төрөөбүт тыл биһигэ» киин иһинэн тиһигин быспакка ыытыллар. Бу тэрээһиҥҥэ библиотека бэтэрээн — эбэтэ Екатерина Николаевна Макарова кэлэн, биир дойдулаахпыт саха тылын учуутала идэлээх Жанна Барашкова «Куобахчаан кэпсээнэ» остуоруйатын билиһиннэрдэ. Остуоруйаны С. А. Новгородов аатынан орто скуола 1 «б» кылааһын оҕолоро иһиттилэр (сал. Татьяна Дмитриевна Барашкова). Остуоруйаны истэн оҕолор ыйытык биэрдилэр, ордук тугу сөбүлээбиттэрин эттилэр. Тэрээһин бүтүүтэ оҕолорго, куар-кодунан киирэн ааҕыллар, биир дойдулаахпыт Р.И. Корякина — Хотууна остуоруйаларын закладка оҥорон бэлэхтээтибит.
