Детская библиотека

Олунньу 8 күнүгэр, биһиги дойдубут Наука күнүн бэлиэтиир. Ханна, хаһан да буоллун, хайа да дойду сайдыытын төрүөтэ — наука. Хас биирдии үлэ, хас биирдии оҥоһук, хас бирдии саҥа технология — барыта наукаҕа олоҕурар.

Саха сирэ -баай, ураты айылҕалаах, талааннаах дьоннордоох дойду. Биһиги ураты тымныы, муус дойдутугар олорон үлэлиибит-хамныыбыт. Онон биһиги наукабыт — аҥардас билиини хомуйар эрэ буолбакка, быһаччы олоххо туттуллар кыһалҕалары быһаарар суолталаах буолуохтаах.

Бу күнү көрсө биһиги наукаҕа быһаччы сыһыаннаах икки ыалдьыты ыҥыран оҕолору кытта көрүһүннэрдибит. Ол курдук, С.К.Макаров аатынан Чурапчытааҕы гимназия 6 кылааһын үөрэнээччитэ Наташа Собакина, салайааччыта Мария Иустиновна Хоютанова уонна рационализатор Иннокентий Николаевич Новгородов кэлэннэр наукаҕа сыһыаннаах үлэлэрин кэпсээтилэр, көрдөрдүлэр.

Наташа мас хатырыгын, отоннору, оҕуруот астарын, фрукталары туһанан 3 сыл устата чинчийэн «Экологически чистые краски» дакылааты суруйбутуттан кэпсээтэ. Бу чинчийиитинэн дьиэҕэ туттуллар мас, таҥас, уруһуй кырааскаларын оҥорбутун көрдөрдө.

Иннокентий Николаевич уһулуччу дьарыктаах, дэгиттэр талааннаах, элбэх идэни баһылаабыт киһи. Кини элбэх научнай кинигэни ааҕан, быраҕыллыбыт техникаттан суола-ииһэ суох сиринэн сылдьар техника оҥорорун, авиационнай — техническэй «Небесный тихоход» диэн оҕолору дьарыктыыр кулуубун кэпсээтэ уонна кулуупка оҕолору ыҥырда. Чурапчы үрдүнэн дельтапланынан көтө сылдьар видеотын оҕолор сэҥээрэ көрдүлэр.

Тэрээһин бүтүүтэ оҕолор уопсай хаартыскаҕа түһэн, интэриэһиргиир ыйытыктарыгар хоруй ыланнар астынан тарҕастылар.

Агния Львовна Барто төрөөбүтэ 120 сылынан «Мичил», «Улыбка», «Туллукчаан» уһуйааннар улахан уонна бэлэмнэнии бөлөҕүн оҕолоругар, Агния Бартону билиһиннэрэр презентация көрдөрдүбүт, ойуулугу туһанан «Игрушки» хоһооннорун оҕолору кытта бииргэ дорҕоонноохтук аахтыбыт, кинигэлэрин билиһиннэрдибит. Кини хоһоонноро олус судургу эрээри, дириҥ ис хоһоонноохтор, оҕону үтүө дьон буола улаатарга үөрэтэллэр.

10 күннээх «English club» курс түмүктэннэ. Бу нэдиэлэ устата оҕолор салҕыы ааҕар, истэр, саҥарар дьоҕурдарын сайыннарыыга элбэх араас сорудахтары толордулар. Дьиэ-уот, эт-сиин, кыыллар, дьүһүннэр уо.д.а темаларга тыл саппааһын кэҥэттилэр.  Тылы эрчийэр көрдөөх разминкалар, дьарык тематыгар сөп түбэһэр английскайдыы ырыалар оҕо болҕомтотун таттылар. Ону таһынан компьютерга сорудахтары толорон астыннылар.