Детская библиотека

Тохсунньу ый 26 күнүттэн оҕо библиотекатын иҺинэн алын кылаас үөрэнээччилэригэр «English club» 10 күннээх интенсив-курс саҕаланна, курсу Саина Васильевна Дегтярева ыытар. Бу курс английскай тыл уруогун ыарырҕатар эбэтэр билиитин хаҥатыан, саҥаны билиэн-көрүөн баҕалаах оҕоҕо аналлаах. Араас үөрэтэр ньымалар оҕо үөрэнэр баҕатын үрдэтэр уонна  салҕыы дьарыктанарыгар көмө буолар. Бастакы нэдиэлэ устата оҕолор таһымнарын быһаарар ааҕыылар, суруйуулар ыытылыннылар. Ону таҺынан аангылыйа тылын дорҕооннорун истэр , хамаандаҕа үлэлиир дьоҕурдарын сайыннарыыга үлэ ыытыллар.

1944 сыллаахха тохсунньу 27 күнүгэр Ленинград куорат блокаданы тулуһан, Кыһыл Армия килбиэннэх кыайыыны ситиһэн, Ленинград блокадата уһуллубута.

2000 тахса саха буойуттара Ленинград куораты көмүскээһиҥҥэ олохторун толук уурбуттара. Кинилэр ааттара историяҕа көмүс буукубанан суруллан үйэлэргэ өлбөөдүйбэт тыыннаах холобур. Бу туһунан «Ааҕар чаас » куруһуок оҕолоро, «Великая Отечественная война: энциклопедия для детей», «Великие победы России» кинигэлэри билсэн, Сергей Алексеев «Подвиг Ленинграда» кинигэтигэр суруйбут «Дивизия» кэпсээнигэр Егор Петров диэн саха снайперын туһунан, аччыктааһын алдьархайын «Таня Савичева» , блокаданы босхолооһуҥҥа Ленинградскай уонна Волховскай фроннар кыайыыны аҕалбыттарын туһунан «На-а-ши!» тэттик кэпсээннэри ааҕан билистилэр. Ону таһынан С. А. Новгородов аатынан Чурапчы орто оскуолатыгар «Прорыв блокады Ленинграда» кинигэ быыстапката тэриллибитэ.

Алгыстаах алаадьынан алгыстанан, үөрэ отунан арчыланан, тохсунньу ый 29 күнүгэр библиотекабыт иһинэн оҕону төрөөбүт тылынан ааҕарга көҕүлүүр «Төрөөбүт тыл биһигэ» киин, арыллан үлэтин саҕалаата. Бу күн «Эбэ ааҕар» диэн дорҕоонноохтук ааҕыы киэбинэн саҕаланна. Биир дойдулаахпыт, оҕо суруйааччыта Р.И. Корякина — Хотууна «Минньигэс түүл» кинигэтиттэн «Киһиргэс куобахчаан» остуоруйаны С.А.Новгородов аатынан Чурапчы орто оскуолатын педагог-библиотекара, эйэҕэс эбэ Людмила Романовна Татаринова олус умсугутуулаахтык аахта, ырытыста. Остуоруйаны 4 «д» кылааһын үөрэнээччилэрэ истэн, бэйэлэрэ остуоруйа айан кэпсииргэ холоннулар. Өссө оҕолор «Өбүгэ үгэһэ» интерактивнай, сахалыы остуол оонньууларынан дуоһуйа оонньоотулар.