Детская библиотека

Бүгүн ахсынньы 9 күнүгэр Чурапчы нэһилиэгин С. А. Новгородов уонна И. М. Павлов ааттарынан орто оскуолалар икки ардыларыгар 2025 сыл үбүлүөйдээх саха литературатын төрүттээччилэриттэн биирдэстэрэ, комедия жанрын төрүттээччи Николай Денисович Неустроев төрөөбүтэ 130, Анастасия Саввична Сыромятникова төрөөбүтэ 110, саха норуодунай суруйааччылара В. С. Соловьев – Болот Боотур төрөөбүтэ 110, Иван Михайлович Гоголев – Кындыл төрөөбүтэ 95 сылларыгар  аналлаах «Өркөн өй» литературнай квест-оонньуу ыытылынна. Оонньуу 4 түһүмэҕинэн барда:

1. «Сыллар , күннэр…» — суруйааччылар олохторуттан, айар үлэлэриттэн таҥыллыбыт интерактивнай викторина.
2. «Кэм кэрдии» — биобиблиографическай справочнигы туһанан ыйытыктарга хоруйу булуу.
3. «Таба таай» — кинигэлэри пааранан сөпкө туруоруу.
4. «Эппиэт таһыгар селфи»- Болот Боотур таабырын хоһооннорунан оонньуу.

Хас биирдии түһүмэххэ уоннуу мүнүүтэ бэрилиннэ. Икки хамаанда иккиэн бэлэмнэнэн кэлбиттэрэ хайҕабыллаах. Оскуола педагог — библиотекардара Евдокия Кимовна Монастырева, Нюргуяна Егоровна Федорова, Людмила Романовна Татаринова оҕолору сыл ахсын бэлэмнээн кытыннараллар. Оонньуу түмүгүнэн оҕолор сертификаттары, грамоталары уонна минньигэс бириис туттулар.

Маннык оонньуу оҕолор сөптөөх, наадалаах билиини иҥэринэллэригэр, саха суруйааччыларын айымньыларыгар, олохторугар, ону таһынан төрөөбүт тылларынан литератураҕа болҕомтону ууралларыгар табыгастаах ньыма буолар.