Нэдиэлэ сонуннара
Олунньу 16-20 күннэригэр, бастакы кылаас үөрэнээччилэригэр эбии сынньалаҥ кэмигэр, Оҕо библиотекатыгар «Төрөөбүт тыл ыллыгынан» сахалыы эйгэ тула дьарык ыытылынна. Манна оҕолор сахалыы кылгас кэпсээннэри аахтылар, ыйдар, кыыллар, көтөрдөр сахалыы ааттарын билсэн ыйытыктарга эппиэттээтилэр, таабырын таайдылар. «Муҥха», «Дьыл оҕуһа», «Тымныы оҕуһа» ойуулуктары сэҥээрэ көрдүлэр, «Айар» кинигэ кыһата таһаарар остуол оонньууларын умсугуйа оонньоотулар. Дорҕоонноохтук ааҕыынан Василина Попова «Тарбахтар», Василий Ушницкай-Сэки»Сулустар уонна ый» остуоруйалары иһиттилэр. «Таал-таал эмээхсин» норуот остуоруйатын сыахай куукулаларынан билиһиннэрдибит, ону бэйэлэрэ хатылаан эмиэ оонньоон көрдөрдүлэр. Уонна онтон наһаа үөрдүлэр. Кылгас кэм иһигэр оҕолор элбэҕи биллилэр, иллэҥ кэмнэрин туһалаахтык атаардылар.
Аҕа дойду көмүскээччилэрин күнүнэн 3″г», 4 «д» кылаас о5олоругар алта түһүмэхтээх «Кистэлэҥ бакыат» диэн оонньуу ыыттыбыт. Оҕолор аймалҕаннаах да буоллаллар, бары түһүмэхтэргэ көхтөөхтүк кытыннылар.
Олунньу 20 күнүгэр, «Төрөөбүт тыл биһигэ» киин иһинэн, «Эбээ ааҕар» көрсүһүүгэ Саха Республикатын үөрэҕириитин туйгуна, РФ уопсай үөрэхтээһинин бочуоттаах үлэһитэ, Россия журналистарын союһун чилиэнэ, Прасковья Ивановна Попова С.А.Новгородов аатынан орто оскуола 5 «в» кылааһын үөрэнээччилэригэр С.Данилов «Манчаары» сэһэниттэн аахта. Прасковья Ивановна оҕолору кытта сөптөөх сыһыаны олохтоон сүрдээх интэриэһинэй, оҕо болҕомтотун тардар, оҕо дьоҕурун көрдөрөр, кинигэ тула истиҥ кэпсэтии таҕыста.
