Детская библиотека

Сэтинньи 21 күнүгэр Оҕо библиотекатыгар Чурапчы нэһилиэгин дьиэҕэ олорон үөрэнэр, доруобуйаларынан хааччахтаах оҕолоругар «Тэбэнэт саас ааҕыылара» НПК сэттис төгүлүн ыытылынна. Быйыл төһө даҕаны кыттааччыбыт кэмчи буоллар тэрээһин сэргэхтик , иһирэхтик буолан ааста. Оҕолор дакылааттарын таһынан «Мин дьиэ кэргэним үйэлээх мала» быыстапкаларын көрдөрөн уонна кэпсээн экспертэр биһирэбиллэрин ыллылар. Экспертэринэн Попова Прасковья Ивановна — Саха Республикатын үөрэҕириитин туйгуна, Российскай Федерация уопсай үөрэхтээһинин бочуоттаах үлэһитэ, Россия суруналыыстарын сойууһун чилиэнэ, Матена Николаевна Захарова — Саха Республикатын культуратын туйгуна, Чурапчы улууһун культуратын ветерана, Е.А. Борисов аатынан библиотека — архив выставочнай салаатын исписэлииһэ үлэлээтилэр. Ол курдук Феофанов Алгый- 4 кылаас үөрэнээччитэ «Орден отечественной войны» диэн тематынан 1 миэстэни, Ильинов Данил — 7 кылаас үөрэнээччитэ «Чай пить- здоровым быть» диэн тематынан 2 миэстэни ыланнар грамоталарынан уонна сыаналаах бириистэринэн наҕараадаланнылар. Ону таһынан «Мин дьиэ кэргэним үйэлээх мала» диэн түһүмэххэ бириистэри уонна анал ааттары тутан үөрүүлэрэ үксээтэ. Кылгас сынньалаҥ кэмигэр о5олор төрөппүттэрин уонна учууталларын кытта кроссенс, таабырын таайдылар.

Оҕо библиотеката доруобуйаларынан хааччахтаах оҕолорго ыытар тэрээһинин өйөөн учуутал идэлээх урбаанньыттарбыт Акулина Дмитриевна Ефремова («АЕestetic» маҕаһыын), Александра Константиновна Осипова («Барыс» маҕаһыын), Саргылана Прокопьевна Филиппова («Эрилик» маҕаһыын) спонсордаан ,бэртээхэй бириистэри бэлэхтээн оҕолор үөрүүлэрин үрдэттилэр. Кинилэргэ барҕа махталбытын тиэрдэбит.

Ону таһынан улахан махталбытын тиэрдэбит оҕолор төрөппүттэригэр, Галина Афанасьевна Никутова салайааччылаах иитэр -үөрэтэр киин коллективыгар.