Детская библиотека

Кинигэни таптыыр, интэриэһиргиир, ааҕар оҕо киэҥ билиилээх, тобуллаҕас өйдөөх, ырааҕы-киэҥи ыраҥалыыр буола улаатар. Онон оҕону кинигэҕэ кыра эрдэҕиттэн сыһыарыахтаахпыт. Оттон талбыт араас, дьэрэкээн кинигэлэр Оҕо библиотекатыгар бааллара саарбаҕа суох. Бүгүн биһиэхэ «Улыбка» уһуйаан улахан уонна бэлэмнэнии бөлөхтөрө, Новгородов аатынан орто оскуола 2г кылааһын үөрэнээччилэрэ ыалдьыттаатылар. Экскурсия библиотека быраабылатын билиһиннэрииттэн саҕаланна. Абонемент, ааҕар саала хосторун кэрийэн көрдүлэр. «Остуоруйа дойдутугар айан» тургутук ыйытыыларыгар бэрт сэргэхтик хоруйдаатылар. Саҥа, сонун, интэриэһинэй кинигэлэри сэргии, соһуйа, астына көрдүлэр. Ол курдук минньигэс сыттаах, муусукалаах, ойон тахсар хартыыналаах кинигэлэр оҕолор интэриэстэрин ордук тартылар. Кыра оҕолорго аналлаах абонемеҥҥа олорон сурунаал, кинигэ көрдүлэр, оонньоон сэргэхсийдилэр.

Оҕо библиотекатыгар оҕолору, төрөппүттэри ыҥырабыт!