Детская библиотека

Оҕо библиотеката бэйэтин күүһүнэн ремоннанан, оҕолорго аанын тэлэччи аста. Бу күннэргэ библиотека аана сабыллыбакка элбэх оҕону көрүстэ. Оҕолор кинигэлэри сэҥээрэн көрдүлэр, аахтылар, саҥаны биллилэр, оонньоон дуоһуйа сынньаннылар. Күн аайы 1-2 кылаас үөрэнээччилэрэ, уһуйаан иитиллээччилэрэ кэлэн, «Кинигэ дьиэтин» кытта билсэн, ураты, сонун, саҥа кинигэлэри кэрэхсии көрөн, сэргээн аастылар. Библиотека үлэһиттэрэ оҕолорго анаан үбүлүөйдээх суруйааччыларга: Макар Хараҕа, Иван Горнайга, Константин Туйаарыскайга, Джанни Родарига литературнай уруоктары ыыттылар. Суруйааччылар олохторун сырдаттылар, хоһооннорун дорҕоонноохтук аахтардылар, ырыттылар, айымньыларын, кинигэлэрин кытта билиһиннэрдилэр. «Березка» уһуйаан иитиллээчилэригэр ыалдьыттаан, кумааҕы куукуланан оҥоһуллубут Самуил Маршак «Акаарычаан кутуйах оҕотун туһунан остуоруйатын» оонньоон көрдөрдүлэр, саҥа кинигэлэри билиһиннэрдилэр. Муусукалаах, тыастаах-уустаах, минньигэс сыттаах, ойон тахсар ойуулаах кинигэлэр ордук оҕо интэриэһин тартылар.

Ааҕааччыларбытын, оҕолору, төрөппүттэри барыгытын Оҕо библиотекатыгар күүтэбит!